आभूषण बजार
चितवन सुनचाँदी व्यवसायी संघको तेस्रो अधिवेशनमा नेपाल सुनचाँदी व्यवसायी महासंघका अध्यक्ष मोहन विश्वकर्माले फेरी भावि अध्यक्षको रुपमा सहयोग गर्न आग्रह गरेपछि विगतको सहमती पालनामा टकराव आउने होकी भन्ने आंशकाले सुनचाँदी बजार गर्मिएको छ । कार्तिकमा हुने भनिएको नेपाल सुनचाँदी व्यवसायी महासंघको तेस्रो महाधिवेशन चैतको लागि सारिएको छ । महासंघको अध्यक्ष फेरी दोहोराउने खिचडी पाक्दैछ या दोस्रो महाधिवेशनमा भएको सहमती अनुसार अहिलेका वरिष्ठ उपाध्यक्ष माणिकरत्न शाक्य अध्यक्ष बनाईदैछ ? चितवनबाट तातो बहस सुरु भएको छ । प्रस्तुत छ यसै विषयमा नेपाल सुनचाँदी व्यवसायी महासंघका वरिष्ठ उपाध्यक्ष माणिकरत्न शाक्यसँग गरिएको कुराकानीको सारसंक्षेप ।
चितवनका सुनचाँदी व्यवसायीको वीचमा वर्तमान अध्यक्ष मोहन विश्वकर्माले फेरी अध्यक्षको रुपमा दोहोरिने अभिव्यक्ति दिनुभयो भने विषय बाहिर आएका छन,तपाईपनि कार्यक्रम अतिथीको कै रुपमा हुनुहुन्थ्यो हैन ?
हो कार्यक्रममा अतिथिको रुपमा महासंघको तर्फबाट हामी पनि थियौं । दर्शक दिर्घाबाट हामीले पनि उहाँबाट यो कुरा सुन्ने मौका पायौं । यो कुरा भक्तपुरका व्यवसायीहरुको वीचमा पनि दोहोरिएछ । वर्तमान अध्यक्ष विश्वकर्मा ज्यूले सहमतीलाई किन विर्सनुभएको हो जस्तो मलाई पनि लाग्दैछ सम्भवत कसैले उचालेको हो कि भन्ने मेरो ठम्माई छ । महासंघलाई बलियो बनाएर सहमतीलाई अक्षंरस पालना गरेर जाने हो दोस्रो महाधिवेशनमा नेतृत्वको लागि भएको सहमतीलाई इमान्दारीताका साथ पालनामा अध्यक्ष ज्यू इमान्दार बन्नुपर्छ । महासंघबाट सम्मानजनक ढंगबाट बहिरगमन हुनका लागि उहाँका यस्ता अभिव्यक्तिले समस्या पैदा गर्छ भन्ने मेरो धारणा रहेको छ ।
दोस्रो महाधिवेशनमा तपाईहरुबीच के सहमती भएको थियो ?
महासंघको भविष्य र एकतालाई मध्यनजर गर्दै विगतमा मैले उहाँलाई सम्मानजनक ढंगबाट नेतृत्व सुम्पिए हो । हामीवीचमा तेस्रो महाधिवेशनमा मलाईनै अध्यक्ष बनाउने गरी सहमती भएको हो । यो फेरी हामी दुईवीच मात्र होइन सवै पदाधिकारी र कार्यसमितिका सदस्यहरुकै सहमतीमा भएको लिखित सहमती हो । मलाई लाग्दछ यो सहमतीको विरुद्धमा मोहन जी जानुहुँदैन भन्ने मैले विश्वास लिएको छु ।
संशोधित विधानले तपाईलाई अर्कोपटक अध्यक्ष हुनबाट रोक्छ भन्ने कुरा आएको छ नी ?
जनकपुरमा भएको विशेष साधारणसभाबाट यो कुरा पनि घुसाइएको रहेछ तर हाम्रो यो ऐजेण्डा थिएन । ऐजेण्डामा नभएको कुरा यसरी राखेर ल्याउनु नियत भन्दा पनि भूल वश भएको होला भन्ने मैले ठानेको छु । त्यसमा अध्यक्ष हुन २ कार्यकाल कार्यसमिति र एक कार्यकाल पदाधिकारी भएको हुनुपर्छ भनिएको रहेछ यो ऐजेण्डा वीचबाट घुसाइएको छ त्रुटीपूर्ण छ यसलाई महासंघलेनै जिल्ला प्रशासन कार्यालय गएर सच्चाउछ ।
दोस्रो महाधिवेशनबाट महासंघको राम्रो र सवैलाई समेटिएको सांगठनिक संरचना बनेको थियो व्यवसायिक हितको लागि राम्रो काम गर्न सकेन भन्ने गुनासो छ नी ?
काम नभएका होइनन भएका छन तर त्यसलाई बाहिर नल्याउदा नदेखिएको हो । महासंघ भित्र केही केही व्यक्तिगत स्वार्थगत कुराहरु भने देखिएका हुन् यसलाई हामीले चिरेर अघि बढ्नुपर्ने देखिन्छ । सरकारको मौद्रिक नीतिमा व्यवसायका राम्रा पक्ष समेटिएका छन् । व्यवसायीको मात्र होइन उपभोक्ता अधिकारको कुरा पनि राज्यतहका नीतिमा समेटिएका छन् । सवै भन्दै राम्रो कुरा मैले पहिलादेखिनै यस विषयमा बहस गर्दै आएको कुरा सुनलाई नगद सरह मान्यता कानुनले दिएको छ । देवानी र फौजदारी संहितामा व्यवसायीलाई विगतको जस्तो अप्ठेरो पार्ने ढंगबाट कानुन बनेको छैन यसमा हाम्रो तर्फबाट राज्यलाई उचित सुझाव दिएकालेनै यसमा हामी सफल भएका हौ ।
सुनचाँदीको पछिल्लो बजार अवस्था के छ ?
विगत ४ महिना देखि सुनचाँदी बजारमा देखिएको मूख्य समस्या भाउकै कारणले नै हो । भाउमा भएको उच्चवृद्धिले कारोवारमा मन्दी आएको हो दशै सुरु भएसँगै भाउ केही सुधार पनि भएको छ जसले गर्दा फेरी पनि सन्तोषजनक रुपमा कारोवार भईरहेको छ ।
अन्त्यमा केही भन्नुहुन्छ ?
सवै भन्दा पहिला म नेपाल सुनचाँदी व्यवसायी महासंघबाट आवद्ध देशभरका व्यवसायी,कालिगढहरुलाई वडा दशैं,शुभपिवाली,छठ एंवम नेपाल सम्बतको अवसरमा हार्दिक शुभकामना व्यक्त गर्न चाहान्छु । महासंघ सुनचाँदी व्यवसाय क्षेत्रको विकासको लागि एक महत्वपूर्ण निकाय हो एकता र सहमतीबाटनै देशभरका व्यवसायीहरुको हकहित स्थापित हुन्छ । सहमती र इमान्दारीतालाई पालना गरेर महासंघलाई एकढिक्का बनाई अपेक्षाकृत उद्देश्य हासिल गर्न एक भएर लाग्न जरुरी छ ।
प्रतिक्रिया दिनुहोस्