आभूषण बजार
चितवन, असार – नेपाल सुनचाँदी व्यवसाय महासङ्घ र नेपाल सुनचाँदी रत्न तथा आभूषण महासंघको संयुक्त निर्देशनअनुसार असार १३ गतेदेखि चितवन जिल्लाभरिका सम्पूर्ण सुनचाँदी पसलहरू बन्द गरिँदै आएको छ। कर तथा नीतिगत असन्तुष्टिका विरुद्ध जारी यो आन्दोलनलाई निरन्तर साथ दिँदै आएका सम्पूर्ण व्यवसायीहरूलाई नेपाल सुनचाँदी व्यवसाय संघ चितवनले विशेष धन्यवाद व्यक्त गरेको छ ।
संघका अध्यक्ष हेमबहादुर बि.कका अनुसार संयुक्त महासंघहरूको हालै सम्पन्न बैठकले आन्दोलनलाई थप सशक्त बनाउँदै अनिश्चितकालीन बन्दलाई निरन्तरता दिने निर्णय गरेको छ। सोही निर्णयअनुसार आज बिहान ११:३० बजे भरतपुर–२३ स्थित कसराचोक, जगतपुरबाट मोटरसाइकल र्याली निकालिएको थियो।
र्यालीले जगतपुर, बरुवा हुँदै माडीको बसन्तपुरसम्मको परिक्रमा गरेको थियो। यसक्रममा विभिन्न स्थानहरूमा कोणसभाहरू आयोजना गरिंदै कर तथा नीतिगत निर्णयहरू विरुद्ध व्यवसायीहरूको आवाज बुलन्द पारिएको थियो।
संघका वरिष्ठ उपाध्यक्ष उत्सव खातीका अनुसार व्यवसायीहरूले सरकारसँग तत्काल संवाद गर्न माग गर्दै सुनचाँदी व्यवसायमा लादिएका कर र नियमहरू खारेज गर्न हस्ताक्षर संकलन अभियान समेत सञ्चालन गरेका छन् ।
कार्यक्रम संघका अध्यक्ष हेमबहादुर विश्वकर्माको अध्यक्षतामा सम्पन्न भएको हो भने सञ्चालन महासचिव गोपाल थापा बि.कले गर्नुभएको थियो।
संघले आगामी दिनमा थप निर्णायक संघर्षका कार्यक्रमहरू सार्वजनिक गर्ने तयारीमा रहेको जनाएको छ ।
प्रतिक्रिया दिनुहोस्