आभूषण बजार
नेपाल सुनचाँदी व्यवसायी महासंघको यहि असोज १२ गते हुने प्रदेश अधिवेशनले सुनचाँदी वृत्तको माहोल तातेको छ । प्रदेश दुईमा शिवकुमार सर्राफ र रामजी साहले अध्यक्ष पदका लागि दावी गर्दै प्यानल घोषणा गरेपछि यो क्षेत्र सवैको चासो र चर्चाको विषय बनेको छ । सहमतीमा छलफल गर्नुको सट्टा चुनावी प्रचार–प्रसारको नाममा मेरो टिमको जीत सुनिश्चित देखेपछि रामजी साहलाई पक्षपोषण गर्दै केही मिडियाले व्यक्तिगत प्रतिष्ठामा आँच आउनेगरी ,आफ्नो विरुद्ध जातीवादी भयो भन्दैं आफुलाई अनरगल प्रचार गरेको भन्दैं अध्यक्षका उम्मेद्वार शिवकुमार सर्राफले आफुँ पनि मिडियामा त्यसलाई खण्डन गर्न बाध्य भएर आएको बताउनुभयो ।
वि.स.२०३५ साल मंसीर ११ गते माता तारादेवी सोनी र पिता प्रल्हाद साह सोनारको कोखबाट बारा कलैयामा जन्मनुभएका शिवकुमार सर्राफ कुरा भन्दा पनि काम गर्न रुचाउने पहिचान बनाउनुभएको व्यवसायीको रुपमा चिनिनुहुन्छ । बारा सुनचाँदी व्यवसायी संघको गठन देखि प्रदेश नम्बर दुईको पर्सा,रौतहट,सर्लाही,लहान,लालवन्दी लगायतका स्थानमा सुनचाँदी व्यवसायीलाई महासंघको सदस्यता दिलाउन र संगठीत गराउन सर्राफको सुरुवातदेखिनै महत्वपूर्ण भूमिका रहेको छ । नेपाल सुनचाँदी व्यवसायी महासंघका केन्द्रिय उपाध्यक्ष र वारा सुनचाँदी व्यवसायी संघका अध्यक्ष समेत रहनुभएका सर्राफ व्यवसायिक क्षेत्रमा सामुहिकरुपमानै व्यवसायीको हित र भलो गर्ने काममा लागौं भन्ने स्वभावको हुनुहुन्छ ।
आफ्नो प्यानलको चुनावी घोषणा पत्र व्यवसायी हितको पक्षमा रहेको भन्दै आफ्नो प्यानलको जीत सुनिश्चित रहेको सर्राफको दावी छ प्रस्तुत छ अध्यक्षका उम्मेद्वार सर्राफसँग आभुषण बजार पत्रिकाले गरेको कुराकानीको सारसंक्षेप ।
शिवजी सुनचाँदी प्रदेश–२ मा असोज १२ को अधिवेशनमा किन यस्तो तामझाम चुनावी माहोल,सहमती गरेर जान सकिन्थेन ?
धन्यवाद आभूषण बजार पत्रिकालाई अन्तरवार्ताको अवसर दिनुभएको मा । कोरोनाको यो विषम परिस्थितीमा सहमतीमै सवै काम होस् भन्ने हाम्रो चाहाना थियो । तर परिस्थिती यस्तो भईदियो कि सहमतीको लागि हामीले अन्तिमसम्म प्रयास गर्दा पनि मेरा चुनावी प्रतिस्पर्धी मित्र रामजी साहले हत्तारिएर अध्यक्षमा उम्मेद्वार घोषणा गर्नुभयो । मलाई लाग्थ्यो हामी विगत र वर्तमानको कामलाई समिक्षा गरेर मिलेरै टिम बनाउन सकिन्थ्यो तर उहाँ किन यसरी हत्तारिएर घोषणा गर्नुभयो अलि बुझिएन तर केही छैन सम्पूर्ण अधिवेशनका प्रतिनिधिहरुले पनि तपाईनै आउनुपर्छ प्रदेश–२ को सुनचाँदीको जग बनाएपनि यसलाई अझ बलियो बनाउनुपर्छ भनेर सवैले भनेपछि म पनि आफ्नो प्यानल घोषणा गरेर आउन बाध्य भएको हो । तर विग्रीएको केही छैन अझै पनि सहमतीमानै मिलाएर पनि जान सकिन्छ ।
भोली सहमती नभए स्थिती मतदानमा गयो भने तपाईले जित्ने आधार के हो त ?
सवै भन्दा पहिलो कुरा त जव मलाई नेपाल सुनचाँदी व्यवसायी महासंघले २०७५ सालमा प्रदेश संयोजक बनायो केन्द्रिय उपाध्यक्ष पनि भएको हैषियतबाट मैले प्रदेश–२ मा समावेशी ढंगबाटनै समिति बनाएको थिए र पुन यसलाई म निरन्तरता दिन चाहान्छु । व्यवस्थित कर–भयमुक्त व्यापार मेरो चुनावी घोषणापत्रको मूल नारा रहेको छ । अव्यवस्थित करका कारण व्यवसायी मारमा परेका छन् ,प्रदेश २ मा शान्ति सुरक्षाको अवस्था अझै नाजुक रहेको छ । व्यवसायीहरुलाई अनकेन बाहानाबाजीमा अझै पनि प्रहरी र प्रशासनबाट फसाउने काम हुँदा त्रासमा व्यापार गर्नुपर्ने अवस्था रहेको छ । व्यवसायीको मनोबल बढाउन र समस्याम पर्दा मैले यहाँका व्यवसायीको सामुहिक सहभागितामा केही पर्दा प्रहरी देखि प्रशासन सवैमा कुरा गरेर समस्याको समाधान गर्न लागि परेका र्छौ । आगामी दिनमा पनि भयमुक्त ढंगबाट व्यापार गर्ने वातावरण गराउन मेरो भूमिका अग्रणीरुपम हुने गर्दछ । अर्को कुरा मेरो प्यानलप्रति सवैको भरोसा र विश्वास छ किन भने मेरो सक्षम उम्मेद्वारहरुलाई प्रतिनिधिमात्र होइन समाजका सवै क्षेत्रले रुचाएको व्यक्तिहरु हुनुहुन्छ । यो टिमबाट काम गर्दा प्रदेश–२ को सुनचाँदी बजार नमुना हुने मैले विश्वास लिएको छु ।
तपाईको उम्मेद्वार के कस्तो हुनुहुन्छ ? सदस्यहरुको त छिनोफानो गर्न किन ढिला नी ?
तपाई आफैले पनि बुझ्न सक्नुहुन्छ उपाध्यक्षका उम्मेद्वार प्रवेशकुमार सर्राफ सवै व्यवसायीसँग घुलमिल हुन सक्ने,प्रहरी प्रशासन देखि स्थानीय प्रशासनसँग सवैसँग समन्वय गरेर व्यवसायीको हितको पक्षमा काम गर्न सक्ने व्यक्तित्व हुनुहुन्छ । उहाँमा पर्सा सुनचाँदी व्यवसायी संघको महासचिव समेत र यस अघि प्रदेश सचिव समेत चलाएको राम्रो अनुभव रहेको छ । वसन्त साह राम्रो सामाजिक छवि भएको व्यक्तित्व हुनुहुन्छ विभिन्न संघसंस्थामा रहेर उहाँले काम गर्नुभएको छ । व्यवसायीलाई एकता गर्न सक्ने क्षमतामा रहेकाले पनि उहाँलाई हामीले उपाध्यक्षको उम्मेद्वार बनाएका हौं । सचिवका उम्मेद्वार विनोद भण्डारी महोत्तरी सुनचाँदी व्यवसायी संघको महासचिव हुुनुहुन्छ महोत्तरीमा विश्वकर्मा देखि सवै व्यवसायीहरुलाई मिलाएर लैजान सक्ने उहाँको खुबी रहेको छ प्रदेश सदस्य भएर पनि काम गरेको उहाँमा राम्रो अनुभव छ । अमित गुप्ता उहाँ पनि राम्रौ बौद्धिक क्षेत्रका व्यक्तित्व हुनुहुन्छ । धनुषा सुनचाँदी व्यवसायी संघको अध्यक्ष समेत रहनुभएका गुप्ता एम.वि.वि.एस डाक्टर समेत हुनुहुन्छ । डाक्टर व्यक्तित्व जो हाम्रो पेशालाई मायाँ गरेर यस क्षेत्रमा समेत क्रियासिल हुनुहुन्छ । कोषाध्यक्षमा हामीले मलंगवा सुनचाँदी व्यवसायी संघका महासचिव कमलेश साहलाई अघि सारेका छौं उहाँ आफैमा अर्थशास्त्र र फाइनान्समा वि.एड गरिसक्नुभएका एक विज्ञ व्यक्ति हुनुहुन्छ । कमलेश जी सर्लाही चेम्बर अफ कर्मसको उप–महासचिव समेत रहेकाले सुनचाँदीलाई अरु व्यवसायिक क्षेत्रसँग समन्वय गर्न सजिलो हुने मैले ठानेको छु । अर्को कुरा सह–कोषाध्यक्षमा भगवान साहलाई उठाएका छौ उहाँ पनि सप्तरी सुनचाँदी व्यवसायी संघको तर्फबाट प्रतिनिधित्व हुनुहुन्छ । इमान्दार र राम्रो काम गर्ने व्यक्तिको रुपमा मैले भगवान साह जीलाई लिएको छु । बाँकी सदस्यहरु छन् यो पनि हामी अव केही दिनमा टुंगो लगाउर्छौ । केहीले मलाई जातिय विरोधी बनाउनको लागि मिडियावाजी गरेको देख्छु, मेरो व्यक्तिगत प्रतिष्ठामा आँच आउने काम गरेको पनि देख्छु मलाई उनीहरुको रवैया देख्दा दुःख लागेको छ । हामीहरुको जीत शुनिश्चित देखेपछि यसरी प्रस्तुत हुनु ति मिडिया र लगाउनेहरुको बाध्यता पनि होला । कार्यसमितिमा विश्वकर्मा देखि सवै समुदायको समावेशी प्रतिनिधित्व हुने गरी म प्रदेश टिम बनाउछु यसमा ढुक्क हुनुहोला ?
तपाईले चुनाव जित्छु भन्नुहुन्छ कति प्रतिनिधि तपाईसँग छन ?
सवैभन्दा पहिला म पर्सा सुनचाँदी व्यवसायी संघका अध्यक्ष तथा महासंघका केन्द्रिय सदस्य निरज सर्राफ ज्यूलाई धन्यवाद दिन चाहान्छु यो अभियानको उहाँ कमाण्डर हुनुहुन्छ । महासंघका प्रवक्ता मनोजकुमार साहप्रति म ऋणिनै छु । महासंघका केन्द्रिय सदस्य बद्रे आलम अन्सारी,लहान सुनचाँदी नगर संघका अध्यक्ष श्यामकुमार साह,सप्तरी सुनचाँदी व्यवसायी संघका अध्यक्ष राजेश साह र बारा सुनचाँदी व्यवसायी संघका संस्थापक अध्यक्ष हरिओम साह सोनार ज्यूको अग्रसरता र अरु टिमको साथबाट हाम्रो जीत सुनिश्चित भएको छ । हाम्रो प्यानलको घोषणासभानै जानकी मन्दिरमा ४१ जना अधिवेशन प्रतिनिधिहरुको समर्थन सहित उपस्थिती रहेको थियो । अहिले ५१ जना हाम्रो पक्षमा रहेका छन । ७० जना अधिवेशन प्रतिनिधिमा ५१ जना हाम्रो पक्षमा आइसकेका छन् ७ वटा जिल्लाका पुरा प्रतिनिधि हाम्रो साथमा छन् । विजयीको लागि ३६ जना भएपुग्छ जसमा हामी ५१ मत ल्याउनेमा दुविधा छैन हाम्रो विजय शुनिश्चित भइसकेको छ । जहाँसम्म मेरो प्रतिस्पर्धी हुनुहुन्छ रामजी साह उहाँले आफ्नो अध्यक्षमा उम्मेद्वारी बाहेक अरु पदको उम्मेदवारीनै घोषणा गर्न सक्नुभएको छैन ।
विगतको कामलाई कसरी स्मरण गर्नुहुन्छ ?
हामीले संघीय सरकारको संरचना अनुसारनै सुनचाँदी प्रदेशको गठन गरेका हौं । महासंघले मलाई यस अघि मलाई विश्वास ग¥यो र सोही मुवाविक हामीले पर्सामा अस्थायी कार्यालय खोलेर कार्य सम्पादन ग¥यौ । अव हामी धनुषामा स्थायी कार्यालय बनाएर व्यवसायी हितको पक्षमा काम गरर्छौ र बलियो महासंघ बनाउन टेवा पुराउर्छौ । अर्को कुरा विगतमा पनि हामीले व्यवसायीलाई समस्या पर्दा प्रदेश सरकारका प्रमुख,मुख्यमन्त्री देखि मन्त्रीहरुलाई ल्याएर सचेतना कार्यक्रम,ज्ञापनपत्र बुझाउने कार्य गरेका थियौ । आगामी दिनमा अझ प्रदेश सुनचाँदीको हकहितका विषयलाई व्यवस्थितरुपमा उठाउर्छौ । हामीले यस अघि पनि मुख्यमन्त्री लालवावु राउत,उद्योगमन्त्री रामनरेश यादव,कानुनमन्त्री ज्ञानेन्द्र यादवलाई भेटेर व्यवसायी हितको पक्षमा धेरै काम गरेका र्छौ । व्यवसायीको हितको पक्षमा भन्सार छुट देखि जिल्ला जिल्लामा टन्चको व्यवस्था गरेर व्यवसायलाई राम्रो बनाउन आगामी दिन अझ मेरो भूमिका हुनेछ । हिजो पनि शिवकुमार सर्राफ प्रत्येक व्यवसायीको दैलो दैलोमा पुगेर व्यवसायीसँग काँध जोडेर समस्याको विरुद्धमा लडेको हो आज पनि लड्ने प्रतिवद्धता व्यक्त गर्दछु । सहमतीको घडीको सुई अझै रोकिएको छैन प्रतिस्पर्धी साथीहरुलाई सहमतिमा आउन फेरी एक पटक अनुरोध गर्दछु ।
प्रतिक्रिया दिनुहोस्